A edición máis fría de RetroCoruña

A edición deste ano de RetroCoruña foi un tanto desafortunada, pois non puido celebrarse na data de costume (a finais do verán) de xeito que a convocaron para o...

RetroCoruña 2014

A edición deste ano de RetroCoruña foi un tanto desafortunada, pois non puido celebrarse na data de costume (a finais do verán) de xeito que a convocaron para o pasado sábado, un día nefasto para encontros deste tipo por coincidir que a noite anterior estaba media Galicia de cea de empresa e por estar un día de auga, frío e vento, que non animaba nadiña a saír da casa.

Pero pese a ter tantos elementos na súa contra, Sergio Modia, a xente a AUIC e outros voluntarios como os integrantes do Movemento Xove non quixeron que 2014 fose un ano sen RetroCoruña e seguiron adiante con este proxecto que en futuras edicións promete recuperar a forza de anteriores entregas.

Entre as cousas máis salientables que vin este ano podemos citar un portátil Sony Vaio C1 PictureBook (concretamente a edición xaponesa do PCG-C1) que é un dos mini-portátiles máis curiosos de finais dos anos 90, especialmente polo tamaño ultra-compacto, e por unha pantalla de 8,9 polgadas cunha resolución bastante rara (1.024 x 480 píxeles).

Sorprendeume ver un Gradiente Expert, equipo que tiña pinta de reprodutor de VHS con teclado, e que era realmente un modelo de MSX vendido no Brasil a partires do Nadal de 1985. Non tiña nin idea de que chegara a comercializarse un produto así (todos os MSX que viran antes estaban integrados no teclado).

No ámbito das consolas puiden ver en funcionamento a curiosa RetroN 5, unha máquina na que podemos conectar cartuchos de consolas Nintendo, Super Nintendo, Mega Drive, Game Boy, Game Boy Color, Game Boy Advance e poder gozar dos xogos destas plataformas nun televisor de alta definición moderno, incluíndo un mando Bluetooth pero sendo capaz de aceptar tamén a conexión dos mandos orixinais das distintas consolas. Unha auténtica flipada que non deixa de ser un emulador para coleccionistas de cartuchos, pero que ten o seu aquel.

Máis tentadora resultaba a tableta con Android GPD G7, que presenta unha aparencia semellante ao tableto-mando da Wii U, pero que serve principalmente para gozar de emuladores de consolas e ordenadores antigos, para poder gozar dos seus xogos cuns controis bastante confortables (en contraste con outros trebellos semellantes que saíron no pasado, e que tiñan uns botóns moi cativos e achegaban un agarre pouco natural). Ao contar cun pantallón de 7 polgadas os xogos poden verse moi ben e, no caso de querer aínda máis tamaño, sempre é posible empregar a saída micro-HDMI para conectar a tableta ao televisor. Este trebello corre perfectamente coa meirande parte dos xogos de máquinas recreativas, de portátiles como a Game Boy Advande ou a PSP, e incluso pode reproducir xogos de Dreamcast e de PlayStation. Unha auténtica pasada que en España podemos atopar por menos de 130 euros e que de importación podería saírnos incluso por menos de 90 euros, o que é todo un caramelo para os amantes da emulación.

Xa a nivel máis persoal podo comentar que foi un pracer poder conversar un anaco cos mozos de Akkad Estudios, que están a ultimar o seu novo xogo Lienzo en Blanco; poder probar o Colours de Axóuxere Games (que estreou beta pública hai poucos días); e incluso poder asistir ao relatorio de Antonio Rodríguez sobre os primeiros anos do Macintosh.

E na mesma liña do que fixen en 2013, este ano tamén publico unha galería fotográfica en Facebook e un pequeno vídeo para que os que non puideron pasarse por RetroCoruña poidan facerse unha idea do que se perderon:

Comentarios

Chíos e rechouchíos

ENTRADAS RELACIONADAS

  • A outra Ana

    Hai un par de semanas estreouse en España o servizo Amazon Locker, que permite que os usuarios de Amazon como dirección de envío dos seus paquetes, en vez de...
  • ExpOtaku meets Zona Otaku

    A semana pasada sobrevivimos a unha edición máis de ExpOtaku, encontro que non sei como fai para xuntar cada ano a máis xente. Eu só puiden achegarme o venres...
  • O tratamento informativo do WannaCry dáme ganas de chorar

    O pasado venres convidáronme a participar no programa Área Pública da TVG para explicar un pouco o problema co ransomware que tiveron na sede central de Telefónica, causando un...
  • En Suíza tamén hai cosplay

    Que actualmente hai convencións fikis por todo o mundo non é ningunha sorpresa, pero sorpréndeme non ter escoitado nunca falar da que montan en Basilea, pois «a Comic Con...