Gardar cousas como borrador no WordPress é un perigo, pois acaba quedando aí e logo non hai xeito de darlle saída. E entre os temas que me faltaban por retomar estaba o das Metrópoles Delirantes, ese podcast sobre a banda deseñada do que visitei a gravación da súa entrega nº 12, e do que tocaba comentar que tamén tiñan un spin-off, De Leria nas Metrópoles, do que tamén puiden asistir como público a unha das súas edicións:
Pero o máis curioso é que, aos poucos días, Nieves Rodríguez e Manu Barreiro visitaron a Carlos Roma no programa Santiago SÍ de Correo TV, para falar da súa iniciativa sonora sobre o mundo das viñetas:
E non só queda aí o asunto, senón que durante o verán tamén temos a Nieves como colaboradora do Galicia Por Diante da Radio Galega, recomendando algunha obra de banda deseñada os mércores un pouco despois das 11:00 horas. Ou sexa, que antes da celebración de Viñetas desde o Atlántico recomendo quecer repasando os podcasts das Metrópoles, vendo o programa de Correo TV e escoitando tamén o servizo á carta da Radio Galega para escolmar todos eses contidos sobre o mundo do cómic de cara á semana do frikerío comiqueiro por excelencia.
Debe estar conectado para enviar un comentario.