Concursos co gallo da Festa do Melindre

O vindeiro 13 de maio, segundo domingo do mes, celébrase unha nova edición da Festa do Melindre de Melide, e para elixir o seu cartel convocouse un concurso do que vén de darse a coñecer a súa gañadora, a deseñadora de interiores de Lleida, Blanca Rocaspana García, a quen o concelleiro de Promoción Económica e Turismo, Santos López, comunicoulle a nova por videoconferencia dende a aula de novas tecnoloxías do Concello.

Pareceume algo rara a fotografía que recolle o orixinal momento, polo feito de combinar a videoconferencia co móbil, cando os smartphones de hoxe tamén fan videoconferencia, pero supoño que a cousa fíxose así para que a fotografía non fose moi rara (pois se puxeramos a Santos co móbil en alto mirando para a pantalla sería difícil saber o que está a facer co trebello).

O cartel da vindeira edición da Festa do Melindre quedaría entón así:

Pero o concurso de carteis non é o único organizado polo concello, senón que os alumnos de calquera centro educativo galego que teñan entre 3 e 15 anos tamén poderán participar do VI Concurso de Debuxo Melindresricos, que nesta sexta edición anima aos cativos máis creativos a presentar as súas ilustracións co melindre e a repostería tradicional da Terra de Melide como temática. As pezas poderán entregarse na Biblioteca Municipal até o venres 3 de maio e os gañadores nalgunha das súas 4 categorías faranse cun vale por importe de 60 euros para gastar no comercio melidense. As bases do concurso están dispoñibles en formato PDF na páxina web do Concello.

Comentarios