Clark Kent deixa o Daily Planet

Estou bastante desencantado co que DC está a facer coa renovación do seu universo de superheroes porque é un cambio feito sen planificación previa, de xeito que non está nada claro o que aconteceu no pasado de personaxes como Superman, Batman ou Green Lantern, ignorando moitos anos de continuidade. Preferiría que tiveran feito unhas Crisis como é debido e non a trapalla que están a desenvolver, aínda que manexen conceptos interesantes.

Entre as moitas cousas que están a facer, nos últimos días captou grande atención dos medios o feito de que no número 13 da colección Superman o alter ego da icona de DC, Clark Kent, pon en dúbida o xornalismo actual e abandona o Daily Planet para converterse nun blogueiro:

Agardo que manteñan a figura do Daily Planet nas novas historias de Superman, pois é un dos elementos máis significativos da súa identidade, pero aproveito para dicir que este polémico paso é de todo menos orixinal, pois nos anos 70 Clark era presentador de televisión da canle WGBS, curiosamente baixo o mando de Morgan Edge (curiosamente o personaxe que agora leva o Daily Planet e que incluso mudou de cor de pel). Vaia, que non é a primeira vez que intentan dar a impresión de que os xornais sucumbiron fronte a outros medios nos comics de Superman. Agardemos que erren unha vez máis.

Comentarios