Wi-Fi en Melide

Aínda que a penetración da Internet non sexa moi boa en Melide, e as boas ofertas de ADSL continúen sen chegar á vila (seguimos a pagar máis por 1 Mbps do que nas cidades pagan por 20 Mbps), teño que admitir que me pareceu boa idea iso de que algúns locais de hostalaría se incoporasen á Free-hotspot.com, que para quen non o saiba, é a mesma plataforma que permite conectarse á Internet sen fíos á beira do río Támesis.
Polo momento só hai dúas cafeterías adheridas á iniciativa, que son:

• A Tenda Xusta
  Calle San Pedro, 5
  Melide, Galicia 15800 ES
  Telf. 981 507667
• Cafe Xanela
  Avenida Martin Freire 10
  Mellid, Galicia 15800 ES
  Telf. 981 505394

Non acabo de entender por qué unha está en Melide e a outra en Mellid, pero o caso é que hai a posibilidade de conectarse á Rede cos portátiles ou cos novos terminais Wi-Fi ( iPod Touch, iPhone ou moitos outros teléfonos intelixentes, así como con consolas de videoxogos portátiles como a Nintendo DS), o que seguro que agradecen peregrinos, turistas ou xente que queira aproveitar os seus momentos de lecer para consultar o e-mail ou mirar algunha curiosidade na Rede mentres agardan a outra persoa nunha cafetería.
A utilidade do servizo é innegable, e non sei se terán moito uso, pero o certo é que nas cafeterías de cidades nas que anuncian que hai Wi-Fi se nota moito (a cantidade de clientes que aparecen co portátil dá medo).
Para facer máis doada a localización das conexións Wi-Fi melidenses subín un mapa a Google:

Visualizar o mapa ampliado

Gustaríame completar o mapa cos lugares de acceso público (de balde ou de pago) na vila, polo que agradecería comentarios ó respecto. Neste momento coido que hai conexión na Noela, na Fundación e no Vagalume, e cónstame que hai máis locais, pero non sei se continúan a dar tal servizo ós seus clientes.

ACTUALIZACIÓN: Finalmente non vou facer unha listaxe de redes Wi-Fi en Melide porque atopei moitas, case todas privadas, das que as había inseguras, e publicar a súa existencia sería algo comprometido.
Cando digo que hai moitas falo de puntos no centro na vila no que chego a detectar 3 ou 4 redes á vez, o que me dá a entender que a vila está repleta de redes Wi-Fi domésticas (e corporativas).

Comentarios