A finais de xaneiro chegou a uns poucos cines a película galega de animación Engurras baseada nun cómic de Paco Roca, e marcando tendencia, a menos de 2 meses da súa estrea en pantalla grande púxose dispoñible en aluguer a través de streaming en Filmin, pero os que queiran conservar esta impresionante obra poden agardar ao mércores da semana que vén, cando Cameo porá á venda a película en formato DVD, nunha edición especial que inclúe a banda sonora e un libro de ilustracións, axudando a animar aos que gozasen da obra a adquirila.
Posiblemente non esteamos ante unha obra de consumo masivo por ser unha película de animación, pero deberíamos desbotar tal prexuízo. É un peliculón, que moitos non descubrirán ata que a vexan por accidente na TVG, pero que merece todos os recoñecementos que está a acadar, polo que recomendo non agardar á súa emisión en aberto, pois teremos distintos xeitos de gozar deste filme conmovedor, non apto para días de chuvia.
24 Abril, 2012
