Os 21 do Camiño supéranse na súa segunda edición

A segunda edición a media maratón Os 21 do Camiño entre as vilas de Palas de Rei e Melide foi todo un éxito, superando sobradamente a pasada edición, cunha participación impresionante (preto de 600 corredores) supondo a consolidación dun encontro deportivo que promete continuar a atraer a xente de toda Galicia durante moitas edicións grazas ao bo ambiente que podía respirarse e á beleza da paisaxe do tramo do Camiño de Santiago que hai entre as vilas luguesa e coruñesa.

Por que comento o das provincias? Pois porque deume a impresión de que nalgúns medios de comunicación esqueceron que Melide está na provincia da Coruña, e así, aparte de poder ver unha nova sobre a competición en El Progreso, no caso de La Voz de Galicia temos que, en vez de recollerse a información na sección de Deportes, foi parar á sección de Lugo, facendo que nos xornais que se distribúen en Melide non puidésemos ver nada sobre o grande evento do día anterior.

Iso si, na TVG puidemos ver unha reportaxe sobre a competición:

O resultado da proba foi bastante predicible, con Pedro Nimo gañando moi sobradamente (fixo un tempo de 1:12:54), ao que acompañarían no podio o marroquí Hassan Lekhili (1:14:30) e o galego Elías Domínguez (1:16:13); mentres que a primeira moza en pasar pola liña de meta foi a venezolana Jocelyn Brea, que demostrou que non é subcampioa do mundo de dúatlon por nada (1:29:19), superando á arzuá Mela Penas (1:29:45), que tivo que conformarse cunha segunda posición.

Pero o importante neste tipo de probas non son os podios, senón a experiencia, o que podía verse claramente cos distintos xeitos que tiña a xente de cruzar a liña de meta:

E tampouco faltaron os que chegaron en familia (aínda que o detalle fíxose demasiado repetitivo):

E non podo deixar de comentar que me fixo graza ver que un dos patrocinadores do evento foi o Trivial da Terra, un xogo móbil nacido na Terra de Melide, que agora proxéctase para toda Galicia, e que vai dinamizarse con interesantes competicións.

Comentarios