O campionato galego de tiracroios chega á súa sétima edición en Melide

O vindeiro luns desenvolverase na vila de Melide o VII Campionato de Tirapedras da Galiza Central, segundo contan no comunicado que veño de recibir:

Por sétimo ano consecutivo, o casco histórico da vila de Melide será o escenario de actividades de posta en valor dos xogos tradicionais, recuperando algúns dos seus espazos públicos a súa función ancestral de espazos de xogo, aínda que só sexa por unha horas.

O acto central será o VII Campionato de Tirapedras da Galiza Central, unha proba que se celebrará o luns, 19 de agosto, a partir das 11.15 h. na Praza das Coles. Na edición de 2012 participaron un total de 50 tiradores e tiradoras, pero na presente edición todo indica que o número de concursantes vai ser superior, dada a expectación creada. Basicamente, cada competidor dispoñerá de seis lanzamentos contra tres dianas (de diferente valor –e dificultade- cada unha delas). Ao final, as tres persoas que acaden as máximas puntuacións en cada categoría serán as gañadoras.

No Campionato non existe distinción por sexos, aínda que si por idades. Os nenos/as de entre 8 e 14 anos lanzarán a unha distancia duns cinco metros e terán os seus propios premios. Os maiores desa idade, lanzarán a uns dez metros. Debe terse en conta, así e todo, que nos xogos tradicionais as regras foron sempre acordadas antes de comezar cada xogo; precisamente por iso a organización tratará de respectar os puntos de vista consensuados entre os participantes antes de comezar a competición, razón pola cal as distancias poderán ser levemente modificadas, segundo as dificultades que se observen nas tiradas de adestramento.

O evento está organizado pola Asociación Galega do Xogo Popular e Tradicional, entidade que leva desenvolvidas ao longo de toda a xeografía galega máis de 300 actividades de divulgación do patrimonio lúdico tradicional. Na presente edición o Campionato conta co patrocinio da Adega O Mandil, e co apoio do Concello de Melide e da Sociedade de Pesca Deportiva Ponte Mazaira.

A competición terá o seguinte regulamento:

· Establécense dúas categorías: 1ª) De 8 a 14 anos; 2ª) A partir dos
14 anos cumpridos.
· Haberá premios para os tres primeiros clasificados en cada
categoría. Competirase polo sistema de eliminación directa.
· Cada tirador/a dispoñerá de seis (6) lanzamentos, podendo
efectualos libremente a calquera das tres dianas (de entre 4 e 9
cm) existentes. Na maior conseguirase un (1) punto por cada
lanzamento acertado, na mediana dous (2) puntos, e na máis
pequena tres (3) puntos.
· A distancia de lanzamento será de cinco (5) metros para a
primeira categoría e de dez (10) metros para a segunda.
· Os empates nos tres primeiros postos de cada categoría reX
solveranse por sucesivas quendas de seis (6) lanzamentos.
· Os tirapedras serán construídos con galleto de madeira, ligas
(lisas, non redondas) de caucho ou látex e badana de coiro. A
organización dispoñerá de tirapedras.
· Ás 11.15 h. comezará a competición para a primeira categoría.
Haberá tiradas de adestramento desde as 11.00 h. Antes do
comezo da competición para a segunda categoría, tamén haberá
tiradas de adestramento. Só poderán adestrar as persoas inscritas
no Campionato.
· A orde de tirada decidirase por sorteo.

E as inscricións poderán realizarse na Libraría Parrado, na mesma Praza das Coles antes do comezo da competición ou por correo electrónico. Teño que preguntar a ver se aceptan tiracroios guiados por GPS…

Comentarios