Dende ZonaDVD anuncian que o vindeiro 23 de abril sairá en España a primeira tempada da serie de televisión de He-Man en formato DVD, o que para min resulta toda unha sorpresa, especialmente tendo en conta que xa hai unha serie nova cos mesmos personaxes.
33 episodios repartidos en 7 discos dentro dun estuche realmente atractivo e coidado, que poderá facer as delicias dos nostálxicos que non se ofendan pola animación rudimentaria deste tipo de series de televisión que non pretendían máis que promover bonecos (coma tamén pasou no seu día coas Tartarugas Ninja, os Transformers ou G.I. Joe).
No pack de DVD sorprendeume ver cómo se inclúen nos extras unha reportaxe sobre Straczynski (a quen adoro por coleccións de comics magníficas coma Midnight Nation), pois non sabía que guionizara 8 episodios da serie de He-Man y los Masters del Universo.
Dende ZonaDVD tamén destacan que a colección incluirá a dobraxe en español neutro, ou sexa, que non sei se sería a que corresponde á seguinte cabeceira (que é a que lembro):
En YouTube hai outra cabeceira que sospeito que aparecía en VHS ou nalgunha outra edición, porque de fondo se escoita unha canción («el universo está protegido por el poder de Grayskull…») que sabía de memoria un curmán meu cando era pequeno (e a min non me sonaba de nada pese a que debín ver a serie enteira no seu día):
¿Alguén me pode ilustrar sobre a dobraxe da serie? ¿De onde saíu a segunda dobraxe? ¿Chegará a España a dobraxe que realmente se emitiu por televisión ou porán a dobraxe sudamericana?
¿Por qué non inclúen a dobraxe en galego? Porque se non me falla a memoria, a serie a emitían pola TVG. ¿Só se ceden as dobraxes de Shin Chan e outras series que provocan a mobilización social? Pois tamén as series casposas merence terse en consideración, ¿eh? (Doutor Who en DVD, ¡xa!).
