Xa temos dominio .gal

Manuel González, presidente da Asociación PuntoGal, nunha fotografía cortesía de Sergio Aramburu, vogal da Asociación

A pasada noite ICANN delegou unha serie de dominios de Internet entre os que se atopaban o .eus e o .gal, o que significa que tras máis de 7 anos de traballo por fin temos un dominio para a lingua e a cultura galegas, ou sexa, que o .gal xa existe realmente (aínda que só nun nome de dominio de carácter técnico e para probas, o nic.gal) polo que agora queda agardar a unha serie de fases para completar o desenvolvemento do dominio de primeiro nivel para que dentro duns meses estea dispoñible de xeito xeral para todos os galegos.

Imaxe da última xuntanza da Directiva da Asociación PuntoGal

Non, esta páxina non mudará a marcus.gal nunhas poucas semanas, senón que inicialmente crearanse uns poucos dominios representativos para promocionar o lanzamento do dominio .gal (o que chamamos Programa Pioneiros), para que logo se abra un proceso de rexistro para entidades e empresas que teñan marcas rexistradas ou que queiran protexer a súa identidade na Rede. Completados estes procesos será cando o dominio abrirase totalmente e funcionará como un .com ou un .es, aínda que sempre cumprindo cunha normativa que precisa que as páxinas web baixo o .gal teñan algún tipo de vencello coa nosa cultura e/ou lingua. Ou sexa, que espero que despois do verán o dominio marcus.gal (e moitos outros) estea operativo, e non só intúo que iso vai supor o cambio do nome de dominio de empresas e institucións públicas, para ter unha presenza na Rede máis galega, senón que tamén confío en que a posibilidade de poder rexistrar baixo un novo sufixo promova a creación de novos proxectos na web. ¿Será o dominio .gal un incentivo para os contidos galegos na Internet? Sen dúbida. E incluso pode ser un catalizador para moitos outros proxectos e iniciativas. Estamos só ante os primeiros pasos dunha criatura cun futuro prometedor.

Comentarios