Socialtrend.com, ou como facer que o de Pervi.es pareza un xogo de nenos

Esta semana o diario El País publicou un longo artigo na súa edición impresa para Galicia no que daban conta dunha empresa galega que ía presentar dende Vilagarcía unha...

Esta semana o diario El País publicou un longo artigo na súa edición impresa para Galicia no que daban conta dunha empresa galega que ía presentar dende Vilagarcía unha nova rede social con vocación internacional, asumindo todas as vendidas de moto da empresa como certas, deixando en ridículo á autora da peza, Elisa Lois, que demostra unha vez máis que ese tipo de informacións non se poden deixar en mans de calquera, e deberían pasar por algún tipo de filtro.
O artigo é unha vergoña de arriba a abaixo, pois asume cifras ridículas que unha persoa con dedos de fronte rexeitaría, como podedes comprobar a continuación:

Una empresa de inversores gallegos crea una red social con 20.000 usuarios de partida

Impulsada con la estrategia comercial de una TIC Internacional (Empresa de Tecnología de la Información) creada en 2009 por inversores gallegos y a la que posteriormente se unieron italianos y suizos, Vilagarcía acogerá la presentación de una nueva red social que comenzará a operar a partir del viernes. Será la primera que se lanza desde Galicia con esas características, ya que cuenta con una cobertura inicial de 20.000 usuarios, clientes de la compañía dentro de sus seis divisiones online. El portal Socialtrend pretende conquistar en la Red 43 países donde el grupo comercial ya está implantado, aunque las mayores expectativas se sitúan en Europa y todo el continente americano.
Ver o resto do artigo ▼

O discurso ambicioso que vemos no artigo lembroume ao que aconteceu no seu día con Pervi.es e La Voz de Galicia (agravado polas televisións autonómicas, que deron credibilidade a tal información), especialmente cando os responsables da plataforma aseguraban que ían achegar prestacións que non teñen os servizos actuais (nesta ocasión falan da protección dos cativos), o que xa debería facer correr a calquera berrando ¡lume!
Presentador do evento de lanzamento de Socialtrend.com
Pero decidín darlles o beneficio da dúbida, e ver pacientemente a presentación de Socialtrend.com a través de streaming, o que agora tamén pode facerse en diferido, se sodes capaces de non cortarvos as veas no intento:

O vídeo xa non está dispoñible para a súa reprodución pública ▼

¡¿Pero que merda é iso?! Unha chea de vendedores de fume italianos, soltando andrómenas ante un auditorio de persoas sometidas previamente a un lavado de cerebro para adorar aos seus líderes como se estivesen nunha seita, aplaudindo sen xeito, bailando, asubiando… dun xeito que nin sequera vemos nos mitins políticos, dando a impresión de que estabamos ante un telepredicadores norteamericanos. ¿Podería saír algo bo de aí? Claramente non.

Pouco a pouco ía véndoselle o plumeiro a esa xente, e o que estaban a presentar era unha serie de produtos que todos levan trend no seu nome, e que ían dende o xogo en liña ata a economía, sempre prometendo beneficios económicos e cun discurso que só busca motivar. Chega con visitar a páxina web de Thetrend Social Corporation para ver de qué vai esta xente, e hai que estar moi desesperado para tragarse o seu discurso, especialmente cando non hai ninguén con credibilidade que os sustente.
Presentación de Socialtrend.com
Pero imos ao noso. A nova rede social. ¿Será unha nova tendencia? ¿Conseguirá captar 100.000 usuarios de cara a febreiro? Pois permitídeme dubidalo, pois para comezar, tan pronto como amosaron a súa interface no evento de Vilagarcía, aseguraron que levaba 10 minutos en liña (mentira, aínda tardou máis dunha hora en funcionar) e que a presentación a través de streaming estaba a ser seguida por 34.000 persoas en todo o mundo (trola moitísimo máis gorda, xa que só eramos 110 persoas seguindo o evento). Queda así totalmente soterrada a credibilidade desta xente, pero a cousa aínda é peor:
– Para comezar, a nova páxina web carece de información imprescindible para un espazo deste tipo, como a identificación da empresa que está detrás, as condicións do servizo e a súa política de privacidade, seccións que están en branco, polo que estariamos ante unha flagrante vulneración da LOPD e da LSSI-CE, como xa aconteceu tanto con Pervi.es coma co patético Parobook.
– Dos prometidos 20.000 usuarios actuais do servizo eu só atopo uns poucos, e practicamente ningunha actividade (só 3 ou 4 molestáronse en subir unha fotografía ao seu perfil). Ou sexa, que nin sequera as persoas que acudiron ao evento de presentación de Socialtrend.com (como oradores) participaron do servizo na súa fase de probas.
– E para acabar de coincidir con Pervi.es, non podía faltar o feito de que non existise un desenvolvemento de software orixinal detrás do proxecto, e temos que Socialtrend.com é unha instalación de iSocial, unha plataforma india de creación de redes sociais que pode mercarse por 297 dólares na súa versión básica.
Captura de Socialtrend.com
Se temos a ousadía de rexistranos en Socialtrend.com (eu fíxeno para probalo, pero non o recomendo), podemos atopar unha plataforma moi pobre, que nin de broma soportaría a 100.000 usuarios, e que dificilmente atopará usuarios máis aló dos descerebrados que piquen nos negocios piramidais multinivel de TheTrend.
One more thing
Para rematar de cagala, tiveron a pouca vergoña de pechar a presentación de Socialtrend.com cun One more thing como facía Steve Jobs nas súas keynotes. ¡Non o teñen crido nin nada!

Dáme bastante carraxe ver que esta panda de falabaratos puido organizar un evento destas dimensións, cuns medios moi superiores aos que estamos afeitos nos encontros tecnolóxicos en Galicia, e cunha retransmisión a través de streaming que destacou pola súa realización profesional (moi televisiva), aínda que os contidos non estaban á altura da técnica. Por fortuna, é de agardar que este tipo de iniciativas cheiren a timo dende lonxe, e espero que este proxecto non acade repercusión mediática nos vindeiros días para que esmoreza como unha trapallada propia das teletendas das 5 da madrugada.

ACTUALIZACIÓN (13-11-2011): Estou abraiado ante o feito de que, tras a polémica que se montou na Internet (especialmente en Twitter) sobre Socialtrend.com algúns medios de comunicación desen algún crédito a tal iniciativa.
É patético que na portada da edición de Arousa do Faro de Vigo publicasen o seguinte:

Una iniciativa con altura de miras
El portal Socialtrend se presentó como un “evento histórico para la humanidad”
Estado que presentó el Auditorio para la presentación de la versión de pruebas de la red Socialtrend. Abajo, Vincenzo Giorgioni interviniendo. //J.L.Oubiña
La empresa Thetrend Social, que patrocina el Cortegada de baloncesto femenino, eligió Vilagarcía para realizar el lanzamiento mundial de su proyecto global de comunicación, idea bautizada como Socialtrend.
El proyecto engloba diversas opciones dentro de un concepto general. Con siete divisiones online, los clientes de esta nueva idea tendrán la posibilidad de disponer de muchas posibilidades. Ramas como el ocio, el entretenimiento o el negocio están incluidas en una iniciativa que pretende conquistar 43 países donde el grupo comercial está ya implantado.

Amosar o resto do artigo ▼

Pero aínda peor foi a reportaxe que Elisa Lois dedicou á presentación en El País:

Internet también tiene guardería
Nace una red social que permitirá a los padres vigilar por dónde navegan sus hijos
Fernando César, creador y director de la red Socialtrend, en el auditorio de Vilagarcía.- CARLOS PUGA
Encima de un enorme escenario multimedia, Fernando César hace un alto en el complejo montaje de uno de los más asombrosos milagros de la comunicación que ofrece Internet. Dentro de siete horas, desde este auditorio de Vilagarcía, él y su equipo conectarán en directo con audiencia de 43 países para estrenar la nueva red social que comenzará a emitir en período de prueba hasta febrero, cuando se lance su versión oficial.

Ver o resto do artigo ▼

Coido que o caso do Faro de Vigo só indica o pouco criterio da cabeceira á hora de destacar unha información (continúo a soster que calquera con dous dedos de fronte que vise de qué ía a presentación de Socialtrend.com fuxiría a fume de carozo), pero o de El País paréceme moi grave, pois a publicación da reportaxe foi despois da polémica creada na Rede (e da que non poden argumentar descoñecemento, pois citónselles explícitamente). Dado que María Encinar descubriunos que a persoa que asina o texto é unha xornalista de verdade, só podo entender que a publicación de tal panfleto propagandistico só pode responder a unha cousa: é unha reportaxe pagada. Cadaquén que saque as súas propias conclusións.

A isto tamén podemos engadir certos comentarios que xurden na Rede (principalmente baseándose nun blog dun afectado, polo que tamén habería que coller a información con pinzas), que vinculan a unha das empresas detrás de Socialtrend.com cunha compañía acusada en Italia de vender sistemas de apostas por Internet como un produto financeiro (o que é ilegal, polo que teñen prohibida temporalmente a súa actividade en Italia). Tamén comentan certas tácticas pouco elegantes para captar público para o evento, así como prácticas laborais moi discutibles por parte de The Trend (que cobran pola formación dos seus potenciais futuros traballadores).Vaia, que a cousa non cheira ben, e os medios de comunicación que publican información comercial sobre certa xente non faría mal en documentarse un pouco antes, polo que puidera pasar no futuro.

ACTUALIZACIÓN (8-3-2012): En vista de varios comentarios supostamente inxuriosos pecho a posibilidade de comentar nesta entrada do blog para evitar que chegue o sangue ao río.

ACTUALIZACIÓN (11-1-2013): Matizar que o autor do blog que asociaba a The Trend Corp con Betexp retractouse e pediu desculpas.
Tamén paso a eliminar certos comentarios supostamente inxuriosos a petición da xente de The Trend Social Corporation.

Comentarios

Chíos e rechouchíos

ENTRADAS RELACIONADAS