«Por muy rápida que sea, a mi no se me escapa», iso din no anuncio radiofónico do tablet que venderá La Voz de Galicia a partir do vindeiro domingo, e como vén a ser habitual nas promocións dos xornais, estamos ante outra oferta da que é mellor fuxir, pois estamos ante un dispositivo cunhas prestacións tan axustadas que non servirá practicamente para nada e, para máis inri, tampouco está ao mellor prezo (podemos atopar dispositivos semellantes, e incluso un chisco máis rápidos, por menos de 30 euros).
Este tablet repite as eivas que presentaba o smartphone do que vendía La Voz hai un par de meses: vén con Android 4.2 e pouca RAM (512 Mb), o seu procesador é moi limitado, e o peor de todo é que a súa pantalla ten unha resolución de 800 x 480 píxeles, ou sexa, que a súa cativa pantalla de 7 polgadas amosará píxeles coma puños (e as páxinas web normalmente non collen en tal ancho, polo que navegar cun dispositivo así é un suplicio, e a pouca densidade de píxeles tampouco permitirá unha lectura cómoda de texto).
A batería de 2.800 mAh tamén resulta moi definiente para unha pantalla de tal tamaño, pois aínda que estaría ben para un smartphone de 5 polgadas, o teléfono ten case sempre a pantalla apagada, mentres que o uso de tablets é principalmente para ver contidos, polo que cun tablet así estaríamos sempre pendentes dun enchufe.
En definitiva, que o meu consello é non mercar produtos deste tipo, pois aínda que poden parecer baratos, ao achegar unha experiencia de uso moi mala, ao final non se usarán nunca, polo que a súa compra é como tirar os cartos.
Debe estar conectado para enviar un comentario.