A Ciberirmandade anuncia que Heroes é a primeira serie de televisión norteamericana en saír en DVD en galego, o que recibiría de moi bo grado se non fose porque a edición sinxela será a única que poidamos mercar nas tendas polo momento, xa que a edición especial que incluía un cómic, un disco extra e unha camisola está esgotada antes do seu lanzamento.
Non sei en qué pensan as produtoras cando lles pasan cousas así. Se Heroes é unha serie super-friki é normal que as edicións frikis se vendan mellor, ¿non? Incluso me atrevería a dicir que foi a tenda de DVDgo a que esgotou as copias (pois foi das poucas que permitiu a reserva) e agardo que a Universal lance unha segunda edición en breve ou, cando menos, para a campaña de Nadal, cando algúns podemos considerar facernos cunha copia das aventuras de Hiro e os seus amigos.
Eu continúo coa dúbida de qué vai ser o cómic que vén co DVD, pois este mes se edita un tomo recopilatorio con tódolos comics da primeira tempada (que finalmente vai ter unha portada de Alex Ross). ¿A desexada edición limitada pagará realmente a pena? Igual non…
17 Outubro, 2007
